అప్పుడప్పుడు

వయసొచ్చిన ఆడపిల్లకి రక్షణలేదొకప్పుడు
ఆడ శిశువులు కూడా బలవుతున్నారప్పుడప్పుడు
మగపిల్లల్ని కూడా మింగేస్తున్నారు కామాంధులిప్పుడు

అర్థరాత్రి అంటే భయముండేదోకప్పుడు
చీకటి పడితే దిగులేస్తుంది అప్పుడప్పుడు
పట్టపగలే నలిపేస్తున్నారు రాకాసులిప్పుడు

క్లబ్బులకి వెళ్తే ప్రమాదమన్నారొకప్పుడు
రోడ్లమీద కూడా రక్షణలేదప్పుడప్పుడు
స్కూల్ బెల్లే మరణమృదంగమిప్పుడు

బూచాడు యవ్వనుడొకప్పుడు
అంకులే బూచాడవుతాడు అప్పుడప్పుడు
వయసుతో సంబంధమే లేదు బూచాడికిప్పుడు

స్త్రీ వస్త్రధారణ కారణమన్నారొకప్పుడు
బాలిక స్కూల్ ఫ్రాక్ రెచ్చగొడుతోంది అప్పుడప్పుడు
చొక్కా లాగుని కూడా వదిలేదిలేదిప్పుడు