అంతర్మధనం

సమయానికి భోజనం దొరుకుతుంది కానీ ఇంకేదో తినాలని ఉంటుంది
కాలక్షేపానికి లోటుండదు కానీ ఇంకేదో చేయాలనుంటుంది
అందరి బెంగలు కనిపిస్తూ ఉంటాయి కానీ ఇంకేదో చూడాలనుంటుంది
వంట్లో ఓపిక ఉండదు కానీ ఏదైనా కొత్తగా చేయాలనుంటుంది
నాలాంటివాళ్లే అందరూ ఇక్కడ కానీ నావాళ్ళు కావాలనుంటుంది

ఒక సహచరుని ఊపిరి ఆగిన రోజున నా ఊపిరి బిగపట్టినట్టుంటుంది
వర్తమానంలో ఉండమని బోధ వినిపిస్తున్నా మనసు పాతరోజుల్లోనే తిరుగుతుంటుంది
నీ తప్పులు వెతుకుతుంటే నాతప్పుల చిట్టా కంటిముందుంటుంది........



నీ చిన్నతనంలో నీ మంచి కోరి కఠినంగా ఉండడమేనేమో, ఈరోజు యీ నీ కఠినత్వానికి కారణం

నీకు సౌకర్యాలు కొనాలని దేశమంతా తిరిగి సంపాదించడంవల్లనేమో, సౌకర్యంగా ఉన్న ఈ హోమ్ లో నేనునుండడానికి  కారణం

ఒకప్పుడు స్వాభిమానం అనుకున్న నా అహంకారమేమో, ఈరోజు నాకు అభిమానం కరువవడానికి కారణం

కాలంతో పాటు మారమని నిన్ను ప్రోత్సహించడం లో పడిన తప్పటడుగేమో, ఇప్పుడు తడబడే అడుగుకి ఊతం లేకపోవడానికి కారణం